Sentâbr 16 künü qırımtatar milliy Meclis binasında keçirileyatqan tintüv ve taqiqat areketleri qırımtatarlarnıñ temsiliy organı sentâr 14 künü işğal etilgen Qırımda ötkerilgen saylavlarnı boykot etmege çağırğanı ile bağlıdır.
Bu kibi fikirni Qırım.Aqiqat mühbirine qırımtatar milliy Qurultayınıñ Teftiş komissiyasınıñ sabıq azası, faaliyetçi Kurtseit Abdullayev bildirdi.
«Qırımtatar halqınıñ qorquzuvı devam ete, çünki Meclis – qırımtatarlarnıñ yekâne temsiliy organıdır. Şunıñ içün Mecliske etilgen ücüm – qırımtatar halqına yapılğan ücümdir»,– dey o.
Qırım.Aqiqat saytı bergen malümatına köre, sentâbr 16 kun tintüv qırımtatar milliy Meclis azası Eskender Bariyevniñ evinde de keçirildi.
Bundan soñ, Aqmescitte yerleşken qırımtatar milliy Meclis binasını silâlı insanlar sarıp aldı, mında tintüvler keçirile. Birinci qatta «Avdet» gazetasınıñ neşriyatı yerleşe, anda da tintüvlerni keçireler.
Hatırlatımız, sentâbr 15 künü qırımtatar milliy Meclis binasına ücüm yapıldı. Üç belgisiz şahıs kirişni qapatıp, qapı ögünde turdı, birisinde pıştav bar edi. Üçünci adam gaz borusı boyunca çıqıp, binanıñ ögünde asılğan Ukraina bayrağını qoparıp aldı.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar keçti. Bunen beraber yerli akimiyet organlarna da saylavlar ötkerildi.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
