Sentâbr 16 künü, sabadan başıap, tintüv keçirileyatqan qırımtatar milliy Meclis binası yanında çalışqan matbuat vastalarınıñ temsilcilerini tevqif ile qorquzalar ve levhalarnı çıqarmağa keder eteler.
Qırım.Aqiqat mühbiri bergen malümatına köre, Rusiye Federatsiyasınıñ akkreditatsiyasını sorap, Meclis binasınıñ yanında işlegen er bir mühbirni videoğa çıqaralar. Uquq qorçalayıcı organlarnıñ vekilleri Rusiye Federatsiyasınıñ memuriy kodeksiniñ 20.2 maddesine esaslanalar – «Toplaşuv, miting, numayış, yürüş ya da narazılıq keçirilmesiniñ ya da teşkil etilmesiniñ terkibiniñ bozuluvı».
Matbuat vastalarnıñ vekillerini vaqia yerini terk etmege çağıralar.
Bunıñ ile Qırım.Aqiqat mühbiriniñ malümatına köre, uquq qorçalayıcı organlarnıñ hadimleri rusiyeli kiyiminde olıp, ukrain şeadetnamelerini köstereler.
Aynı zamanda, işke kelgen Meclis azalarını binağa kirsetmeyler ve ne sebepten bu tedbirler keçirilgenini de bildirmeyler.
Meclisniñ tış siyasiy alâqalar bölüginiñ reberi Ali Hamzin bu tedbir sentâbr 15 künü Meclis binasından qoparıp alınğan, amma bugün kene yerleştirilgen Ukraina bayrağı ile bağlı olğanını tüşüne.
Maskalı ve silâlı insanlar kimni temsil eteler belli degil.
Qırım.Aqiqat saytı bergen malümatına köre, sentâbr 16 kun tintüv qırımtatar milliy Meclis azası Eskender Bariyevniñ evinde de keçirildi.
Bundan soñ, Aqmescitte yerleşken qırımtatar milliy Meclis binasını silâlı insanlar sarıp aldı, mında tintüvler keçirile. Birinci qatta «Avdet» gazetasınıñ neşriyatı yerleşe, anda da tintüvlerni keçireler.
Hatırlatımız, sentâbr 15 künü qırımtatar milliy Meclis binasına ücüm yapıldı. Üç belgisiz şahıs kirişni qapatıp, qapı ögünde turdı, birisinde pıştav bar edi. Üçünci adam gaz borusı boyunca çıqıp, binanıñ ögünde asılğan Ukraina bayrağını qoparıp aldı.
