Sentâbr 16 künü saba tañda Aqmescit civarında Molodöjnoye köyünde yaşağan Meclis azası Eskender Bariyevniñ dairesine silâlanğan şahıslar atılıp kirdiler.
Bunı o şahsen Qırım.Aqiqatqa bildirdi.
«Silâlanğan adamlar keldi, başından podyezdni sarıp aldılar, soñra sade urbada olğan şahıslar kirip, er yerni tintip başladılar. Olar islam mevzusında kitaplarnı qıdırdılar, noutbuk, bilgisayarnıñ sistema blokunı alıp kettiler», – dep añlattı Bariyev.
Şu adamlar başından özlerini qaba alıp bardılar, qoranta ve balalarnı qorquzdılar. Amma, tenbiyelevden soñ, biraz nezaketlice oldılar, dedi Bariyev.
Onıñ malümatına köre, tintüvni FSB (FHH) hadimleri tintüvni keçirdiler. Olar, bu tedbirler Mustafa Cemilevniñ mayıs 3 künü, Ermeni Bazar yanında qarşılavınen bağlı, dep ayttılar.
«Tintüv şu cinaiy işler sebebinden keçirilgenini añlattılar, tintüvnen bağlı sanktsiyaları bar olğanını dediler, amma, maña onıñ nushasını qaldırmadılar», – dedi Bariyev.
Meclis azası bu vaqialarnı «içtimaiy ayatta faal olğanlarnıñ qorquzuvı, psihiologik basqı kibi» tanıy.
«Ömürim devamında men bu kibi şeylernen rast kelmegen edim, çünki qanunnı bozmadım. Onıñ içün, cemaatçılıq arasındaki faaliyetimni devam etmeme bir mania olaraq psihologik basqını qullanalar», – dey Bariyev.
Tintüvni keçirgenler Meclis azasınıñ evini endi terk ettiler, o ise, tehnikasını qaytarmağa areket etecek.
«Çoq yıllar devamında toplağan çalışmalarım anda saqlı, şu malümat menim içün müim».
Eskender Bariyev Meclis azasıdır, o Qırım akimiyetine qırımtatarlarnıñ qoşulmasına qarşı çıqa edi. Ve Qırımnıñ işğalini teñqid ete edi.
Qırımda qırımtatar qorantalarnıñ evlerinde tintüvler sıqlaştı, esasen «silâ, afyon, yasaqlanğan edebiyatnı» qıdıralar.
Soñki vaqia Üç Quyu rayonında İdris Ametov ve torunınıñ evinde ötkerildi.
