Link açıqlığı

Sentâbrniñ 16-nda, salı künü Aqmescitniñ Şmidt soqağında yerleşken Meclis binasını silâlanğan şahıslar sarıp aldılar.

Qırım.Aqiqat hadimi bildirgeni kibi, Meclisni arbiy urbada, avtomatlarnen silâlanğan 6 maskalı şahıs ve 10 politsiya hadimi sarıp aldı. Bina yanında avtozak buluna.

Meclisni ne sebepten sarıp alğanları, ve olar kimler olğanı aqqında suallerge, şu şahıslar cevap bermege red ettiler ve «cevap bermege aytmağa aqları yoq, dediler».

Qırım.Aqiqat mühbiri ögrengeni kibi, binada taqiq işleri ötkerile. İçine ve ondan tış iç bir kimseni yibermeyler.

Şu yerde bulunğan hadimimiz aytqanı kibi, tintüv Meclis binasında yerleşken «Avdet» gazetasınıñ muarririyetinde ötkerile. Muarrir iş yerinde yoq, tintüvni onsız keçireler.

Hatırlatamız, sentâbr 16 künü, Meclis azası Eskender Bariyevniñ evinde tintüv ötkerildi, ve bilgisayarlarnı alıp kettiler.

Sentâbr 15 künü Meclis binasına ücüm etildi. Üç belgisiz maskalı şahıs kelip, ekii qapuda turdılar, birisiniñ qolunda pıştav bar edi, üçüncisi ise, gaz borusı yardımınen töpege tırmaşıp, Ukraina bayrağını alıp taşladı.

XS
SM
MD
LG