Qırımnıñ «Devlet şurasına» saylavlar boyunca protokollarnıñ 84,63% baqılğanından soñ, «Yedinaya Rossiya» firqası alâ daa saylayıcılarnıñ sayısı boyunca birincilkte turğanı bellidir.
Rusiye Federatsiyasınıñ Devlet saylav komissiyasınıñ resmiy saytında bildirilgeni kibi, qırım «yedinorossları» reylerniñ 70,45% qazana.
Merkeziy Saylav komissiyanıñ malümatına köre, «Yedinaya Rossiya» namzetleri bütün birmandatlı bölüklerde de ğalebe qazanğan eken.
Çoqmandatlı bölüklerde ekinci yerde – LDPR tura, 8,29% qol tuttı.
Aynı zamanda, olğan malümatqa köre, KPRF 4,4% qazanmaqta, «Rodina» – 2,73%, «Kommunistı Rossii» – 2,06%, «Rossiyskaya partiya pensionerov za spravedlivost» – 1,92%, «Spravedlivaya Rossiya» – 1,75%, «Demokratiçeskaya partiya» – 1,33%, «Patriotı Rossii» – 1,19%, KPSS – 0,85%, REP «Zelönıye» – 0,8% ve «Partiya veteranov Rossii» – 0,68%.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar keçti. Bunen beraber yerli akimiyet organlarna da saylavlar ötkerildi.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
