Keriçte sentâbr 14 künü «Qırım» – «Kavkaz» limanları arasında «Glykofilousa III» yañı paromı yürmege başladı. İçine 100 maşina sığa bile.
Bunı Qırımnıñ işğalci akimiyetiniñ ruporı «Krım-inform, Qırımnıñ naqliyat ve alâqa «nazirligi»niñ matbuat hızmetine esaslanıp, bildire.
Paromğa, naqliyat nazirliginiñ malümatına köre, 350 insan sığa. Paromnıñ uzunlığı – 102 metr, keñligi – 18 metr.
«Nazirlikte» qayd ettiler ki, «Kavkaz» limanında nevbet 20 maşınağa, «Qırım» limanında – 10 maşınağa azaldı.
«Vaziyet tertipleşti, paromnıñ beklev vaqtı – bir saattan az oldı»,– deyler mında.
«Al-azırda Keriç boğazındaki keçitte yedi esas parom çalışa: «Keriç – 2» (215 insan, 31 maşina), «Yeysk» (175 insan, 25 maşina), «Nikolay Aksenenko» (261 insan, 47 maşina), «İonas» (600 insan, 170 maşina), «Qırım» (700 insan, 160 maşina), «Olimpiada» (600 insan, 170 maşina), «Sevastopol» (50 insan, 20 maşina), em de «Petrovsk», «Annenkov» qoşma demiröl paromları ve «Soçi 1» katamaranı.
