Qırım devlet şurası ve yerli akimiyet organlarına «saylavlar»ğa qatnaşqanlarnıñ sayısı az olğanını Meclis reisi Refat Çubarov «ayınuv» kibi adlandırdı.
Bunı o Qırım.Aqiqatqa bildirdi.
«Qırım cemaatçılıqnıñ bir qısımı bu saylavlarnı boykot etti, – dedi Çubarov. – Olar mart ayında referendumğa qarşı olıp, aqlı olğanlarını añladılar».
Bu adamlarnıñ arasında, Meclis reisiniñ fikirince, «aman-aman episi qırımtatarlar» ve Qırımnıñ statusınen razı olmağan diger sakinler mevcut.
«Amma, olarğa başqaları da qoşuldı, Rusiyeniñ kelüvine başından quvanğan soyları. Olar, az-buçuq olsa da ayınıp başladılar», – dedi Çubarov.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar keçti. Bunen beraber yerli akimiyet organlarna da saylavlar ötkerildi.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
