İçtimaiy ağlarda sentâbr 14 künü keçirilgen Qırım «saylavlar»ından bülletenlerniñ fotoları peyda olmağa başladı.
Fotolarğa köre, bülletenlerge Ukraina tuğrasını çezip, «Ukrainağa şan-şerefler olsun» ve «Putin, Qırımnı yerine qaytar» degen yazılarnı qaldırdılar.
Bunıñ ile içtimaiy ağlarda «Qırım – Ukraina», «Ukrainağa şan-şerefler olsun» degen yazıları ile bülletenler Rusiyeniñ diger regionlarından da peyda olmağa başladı.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar keçti. Bunen beraber yerli akimiyet organlarna da saylavlar ötkerildi.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
