İşğal etilgen Qırımda 80 biñ qırımlı saylav bölüklerine kelip, cedvellerde öz soyadlarını tapmadılar.
Bunı Qırımnıñ Saylav komissiya reisi Mihail Malışev bildirdi ve insanlar qoşma cedvellerge episi bir kirsetilip, rey bergenlerini qayd etti, – dep yaza sentâbr 15 künü Qırımnıñ öz başına tayin etilgen akimiyetine yaqın olğan «Krıminform» saytı.
«80 biñden ziyade insan tünevin qoşma cedvellerge kirsetildi. Böyle vaziyetniñ sebebi er keske añlaşıla, dep tüşünem – Qırım Cumhuriyetinde pasportlarnıñ berüv suratı bu cedvellerniñ kefaletine tesir etti. Amma tünevin bölüklerge kelgen ve cedvellerde öz adını tapmağan er bir vatandaş, mütenasip vesiqası olğan alda, rey bergeni aqqında ayta bilem», – dedi Malışev.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar keçti. Bunen beraber yerli akimiyet organlarna da saylavlar ötkerildi.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
