Link açıqlığı

İşğal etilgen Qırımda sentâbr 15 künü qırımtatar milliy Meclis binasına ücüm etildi. Bunı Qırım.Aqiqat saytına «Qırım» fondı» hayriye teşkilâtınıñ başı, Meclis azası Riza Şevkiyev bildirdi.

Onıñ sözlerine köre, gece saat 03:15 Aqmescitte yerleşken Meclis binasına 3 belgisiz şahıs keldi. Ekisi kiriş qapınıñ ögünde turıp, kirişni qapattılar, birisiniñ elinde pıştav bar edi.

Bu vaqıt, Riza Şevkiyeniñ aytqanı kibi, üçünci adam gaz borusı boyunca köterilip, binada asılğan Ukraina bayrağını qopardı.

«Ukraina bayrağı yerge tüşürilgeninden soñ, belgisiz insanlar onı alıp, kettiler. Er şey eki daqiqa içinde yapıldı. Yani, evelden azırlanılğan ve planlaştırılğan ameliyat edi», – dep tarif etti Qırım.Aqiqatqa Riza Şevkiyev.

O şunı da qayd etti ki, birden «politsiya» çağırıldı. Olğan vaqia videonezaret kamerasına yazıldı, yazı da «politsiya»ğa berilecektir.

Qırımtatar milliy Meclisi bulunğan binadan Ukraina bayrağını endi defalarca tüşürmege tırışqan ediler.

Bunıñ ile, qırımtatar milliy Meclis binasında yerleşken Ukraina bayrağı sebebinden politsiya ziyaretleri de olğan edi.

XS
SM
MD
LG