2012 senesi Ukraina parlamentine saylanğan halq deputatı Bоris Deyç bazar künü, sentâbr 14-de, Qırım «Devlet şurasına» ve «akimiyeti»niñ belediye organlarına olğan «saylavlar»da iştirak etti.
Bunı internette peyda olğan video tasdiqlay.
«Men bugün eyi Qırım, kelecekte eñ güzel olacaq şeer (Sudaq – muar.), qırımlılarnıñ eyi ayatı içün rey berdim. Yaşayışnı daa da aenkli, güzel ve adaletli etecek insanlarğa qol tuttım», – dedi Deyç.
Deyç al-azırda Ukraina deputatı sayıla. Yuqarı Şurasınıñ resmiy portalında olğan malümatqa köre, soñki sefer Deyç memleketniñ uquq çıqarıcı organınıñ işine iyülniñ 3-de qoşuldı.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar başlandı. Bunen beraber yerli akimiyet organlarna da saylavlar ötkerile.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı. Saylavlarnıñ teşkilâtçılarını 10 yılğa apiske ala bileler.
İşğal etilgen Qırımda saylavlarğa öz menfiy munasebetini Ukraina SNBO, İçki İşler Nazirligi de bildirdi.
Qırımtatar milliy meclisi ve qırımtatarlarnıñ bir sıra teşkilâtçıları vatandaşlarnı saylavlarnı boykot etmege çağırğan edi.
