«İslâm terrorizmi» Qırımda tarqatılğan bir şey degil edi, amma bugün yarımadada içtimaiy ya da milletlerara vaziyet kerginleşse, «islâm diniy faktorı» çıqa bile.
Bunı rusiyeli siyasetşınas Aleksey Malaşenko bildirdi, dep haber ete Islam News.
Onıñ sözlerine köre, Ukraina islamğa olduqça yahşı munasebette edi.
«Bıltır ya da bundan evelki senelerde anda Hizb ut-Tahrir toplaşuvını keçirmege istegen ediler. Söz sırası, Hizb ut-Tahrir – ekstremist degiller! Radikallar olsa da, halifatnı çeşit vastalar ile pekitecek insanlar degiller. Konsensus bar edi ve olar çoq şeyni yapa bile ediler», – dedi Malaşenko.
Aynı zamanda, onıñ sözlerine köre, Meclis – «tatar teşkilâtlarından eñ büyügidir – islâmlaştıruvğa, islâm faktorını qullanmağa ıntılmay edi».
«Bir vaqıtları çeçen separatizmi desteklene edi. Mustafa Cemilevniñ iş odasında Dudayevniñ fotosüreti asıla edi. Amma bunı er kes bile. Amma halifat, islâm devletiniñ ğayesi Qırımda yer tapalmay edi. Bazıları oña qol tuta edi, bazıları – yoq, amma Ukraina içün ekstremizm, radikallar (terrorizm bile) telükesiz edi», – dedi o.
«Afsus ki, bizde islâm zararlı bir şey olaraq tanılğanından ğayrı, onı siyasiy alet kibi qullanalar. Qırımda pomidor, qurulıp bitirlmegen köpür sebebinden vaziyetniñ kerginleşmesini tasavur etiñiz… Duşman kerektir. Duşman kim olacaq? Amerikanlılar anda yetemezler. Demek duşmannı qıdırmağa kerek. Qaydadır o? Mına o, tatarlar, añlaysıñız. Böyle bir şablon. Olarnı sanki dersiñ Ben Ladenler kibi körsete bileler. Qırım – Rusiye hususiyetleri ile Rusiyeniñ qısmıdr»,– dey siyasetşınas.
Malaşenkonıñ sözlerine köre, eger de Kreml buña yol berse, «Qırımda islâm diniy faktorı ola bile».
