Ukrain yırcısı, qırımlı Camala Odessa vilâyetinde keçirileyatqan «Caz Köktebel-2014» festivaliniñ hedlaynerleriden biri ola.
Öz çıqışından evel o Qırım.Aqiqat saytına intervyü berdi. Böyleliknen Qırımda bulunğan vatandaşlarına muracaatta bulundı.
Camala qırımtatarlarnı eyilikke işançını saqlamağa çağırdı.
«Er şey yahşı olacağına, tınçlıqnıñ üküm sürecegine, Qırım – Ukraina olğanına inanğanıñıznı isteyim. Ümüt ve işançnı coymağanıñıznı isteyim, çünki bu er şey bizge yardım ete», – dedi yırcı.
Camala vatandaşlarına bu ağır vaqıtta öz tuvğanlarına daa da yaqın olmağa tevsiye etti.
«Qırımda bulunğan soy-soplarıma, 86 yaşında olğan qartbabama olğan sevgim mañya yardım ete», – dedi yırcı.
Tezden Qırım.Aqiqatta Camalanıñ tam intervyüsi peyda olacaq.
Qırımnıñ Rusiye tarafından işğalinden sebep, «Caz Köktebel» Odessa vilâyetinde keçirile.
