Sentâbr 14 künü keçirilecek «Qırımnıñ devlet şurası»na deputatlarnıñ saylavlarına 100 mln ruble masraf etildi, dep bildirdi sentâbr 12 künü jurnalistlerge Qırımnıñ saylav komissiya reisi Mihail Malışev, dep haber ete öz başına tayin etilgen akimiyetniñ ruporı Krıminform saytı.
«Qırımnıñ Devlet şurasına deputatlarnıñ saylavlarına cumhuriyet bücetinden 99,2 mln ruble ayırıldı. Paranı cumhuriyetniñ saylav komissiyası tarqata», – dedi Malışev.
Şu cümleden, 79,1 mln ruble şeer ve rayon saylav komissiyalarına berildi, 20 mln ruble – cumhuriyet saylav komissiyasına, olardan 1,6 mln ruble – bülletenlerniñ azırlanuvına masraf etildi.
Neşirniñ malümatına köre, jurnalistlerge kösterilgen bülletenler 3 tilde basılğan – rus, ukrain ve qırımtatar.
Malışev qayd etti ki, Qırımda GAS «Saylavlar» tertibatı olğan 27 territorial saylav komissiyası çalışa. Saylav künü 1204 saylav bölügi açılacaq, olardan 42 – vatandaşlarnıñ vaqtınca bulunuv yerlerinde.
Ukraina baş prokuraturası Qırım Muhtar Cumhuriyetinde qanunsız saylavlarnıñ keçirilmesi cinayet olğanı aqqında arizası ile çıqışta bulundı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
