Lvovda qırımtatarlarnıñ cemiyeti peyda ola bile.
Cemiyetniñ peyda oluv imkâniyetini sentâbr 12 künü Lvov şeer yolbaşçısı Andriy Sadovoy ile qırımtatarlarnıñ milliy Meclisi reisi Refat Çubarov muzakere ettiler.
Bunı o, öz Facebook saifesinde bildirdi.
Meclis başınıñ saifesinde peyda olğan fotoğa köre, Lvov yolbaşçısı ile körüşüvge Qurultaynıñ teftiş komissiya reisi Ali Ozenbaş da keldi. Oña ise yaqında Rusiye sıñırcıları Qırımdan çıqmağa keder etmege çalıştılar.
«Vgolos» bergen malümatına köre, Refat Çubarov cemiyet qırımtatarlarnıñ şahsiy ve umumiy imkânlarını arttıracaq teşkiliy-ruhiy bir teşkilât olacağını qayd etti. Cemiyetniñ faaliyetinde esas temellerden biri diniy taraf olmalıdır.
Çubarovnıñ sözlerine köre, bazı şeerlerde cemiyetler endi bar, Kiyevdeki teşkilât ise Ukraina boyunca yaşağan bütün qırımtatarlar ile işbirlikni alıp bara eken. O şunı da qayd etti ki, yaqın zamanda qırımtatarlarnıñ Lvov cemiyeti saylavlarnı keçirip, idare organlarnı belgilemek kerek.
Lvov vilâyetinde, resmiy malümatqa köre, işğal etilgen Qırımdan köçip kelgen 2300-den ziyade insan yaşay.
