Qırımtatarlarnıñ ekseriyeti işğal etilgen Qırımda «Devlet şurası» ve yerli organlarğa sentâbr 14 kününe belgiyenlengen saylavlarına barmaycaq. Bunı Ukraina halq vekili, qırımtatarlar milliy lideri Mustafa Cemilev «Pervıy natsionalnıy» kanalınıñ efirinde sentâbrniñ 11-nde bildirdi.
«Saylavlarda iştirak etmege aqqı olğan 180 biñ qırımtatardan, misal içün referendumda 700-800 adam iştirak etti. Bu qırımtatarlarnıñ tahminen 0,5% fayızıdır», – dedi o.
Cemilevniñ fikirince, yapılğan basqı közge alınsa, iştirakçilerniñ sayısı çoqça olur, amma bütün halq qatnaşacaq demege yañlıştır.
«Halq umumen alğanda boykot etecek», – qayd etti Cemilev.
O, Qırım saylaycılarına yapılğan basqı aqqında ikâye etti.
«Er keske saylavlarğa barmaq kerekligini añlatalar, kimler barmasa, olarnen ciddiy subet ötkerilecek eken. Er kesni qandırmağa tırışalar», ¬– dedi Cemilev.
Onıñ bildirgenine köre, Mecliste «saylavlarda iştirak etüv işğilci akimiyetni qanunlaştıracaq, saylav sistemasınıñ özü da, er şey adaletli keçeceginde şübe doğura».
«Olar kelişken adamlarnı, qırımtatarlar arasından da qıdır tapacaqlar, onıñ içün saylavlarda iştirak etmemege daa eyidir», – qayd etti Cemilev.
Aynı zamanda qırımtatarlarnı Qırımda yoq etileceginden saqına. Onıñ malümatına köre, şimdiki vaqıtta Qırım imayecileri faal şekilde silâlanalar.
«Bizim malümatımızğa köre, olar ğayıp etilecek insanlarnıñ cedvellerini tizeler. Soy adlarına baqqanda, regional, yerli meclis azaları, qırımtatar milliy areketiniñ teşebbüsçilerini kördik»,– dedi Cemilev.
Evelden Meclis işğal etilgen Qırım sakinlerini saylavlarnı boykot etmege çağırğan edi.
Qırımtatarlarnıñ milliy areketi de qanunsız saylavlarda iştirak etmemege çağırdı. Arizanı Rusiye prezidenti Vladimir Pütin ve Ukraina prezidenti Pötr Poroşenkoğa yollanıldı.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı.
