İşğal etilgen Qırımda cumhuriyet sağlıq saqlav nazirligi yolbaşçısınıñ birinci muavini Ablâmit Ziyatdinov işten boşatıldı. Bunı sentâbr 11-de Qırımnıñ öz başına ilân etilgen baş naziri Sergey Aksönov bildirdi, – dep haber ete Qırım «akimiyetiniñ» «ruporı» «Krıminform» saytı.
Bunı Aksönov Rusiye prezidentiniñ mesleatçısı İgor Levitin ve Qırım işleri boyunca nazir muavini Andrey Sokolovğa Rusiye prezidenti Vladimir Putinniñ avalelerini yerine ketirüv boyunca maruzasını seslendirir eken, ayttı.
Onıñ bildirgenine köre, raqiplik siyaseti komiteti qanun bozuluvı, em de vekâletli şahıslarnıñ emek nizamını bozğanlarını qayd etti.
Aksönovnıñ qayd etkenine köre, işbu areketlerge alâqası olğan adamlar da cezasını alacaqlar.
