Federal migratsion hızmetiniñ idaresi Aqmescitte çetel pasportlarnı berüv ilk noqtasını açtı. Merkez Gagarin, 18-a adresi boyunca yerleşe.
Bunı Qırım «ükümetiniñ» matbuat hızmeti bildire.
Yerli akimiyet merkezde büyük nevbetler olacağına azırlıq köreler.
«2015 senesi yanvar 1-ne qadar qırımlılarğa çetel pasportlarnı bedava berecekler. Pasportnı berüv müddeti 1 ay sürecek. Başında, elbet de, nevbetler olacaq, lâkin er kes ardı-sıra çetel pasportını elde etecek», - dep qayd etti Qırım FMS reberi Pötr Yaroş.
Onıñ aytqanına köre, merkezniñ bütün donatmaları, blank ve müürleri bar. Çetel pasportnı almaq içün vesiqalar cedvelini Federal migratsion hızmetiniñ idaresinde ögrenmek mümkün.
