Link açıqlığı

Ukraina Nazirler Kabineti yanındaki Qırım meseleleri boyunca Devlet hızmetiniñ yolbaşçısı vazifesine 8 namzet bar


Avgustnıñ başında Ukraina Nazirler Kabineti tarafından teşkil etilgen Qırımve vaqtınca yerini deñiştirgen şahıslar meseleleri boyunca Devlet hızmetiniñ yolbaşçısı vazifesine namzetler konkursına bugünki künge qadar sekiz ariza berildi.

Namzetlerden ekisi Mecburiy keçken olğanlar cemaat teşkilâtlarınıñ Koordinatsion Şurasını temsil eteler. Böyle malümatnı Şuranıñ reislerinden biri Andrey Şçekun Qırım.Aqiqat mühbirine bildirdi. «Koordinatsion Şurasından cemaat faalleri Sergey Kovalskiy ve Sergey Mokrenük ariza berdiler. Şimdilik eki namzetimiz bar. Yarışlaşsınlar, eñ küçlü ğalebe qazanacaqtır. Biz namzet olaraq özüni teklif etken er keske qol tutmağa qarar aldıq», – dep ayttı Şçekun.

Onıñ bildirgenine köre, konkursta iştirak etmek içün Alupka şeer şurasınıñ sabıq kâtibi Pavel Postnikov da ariza berdi.

Qırım meseleleri boyunca Devlet hızmetiniñ yolbaşçısı vazifesine daa bir namzet - Qırım regional inkişafı agentliginiñ sabıq yolbaşçısı Aleksey Starodubov. Şimdiki vaqıtta Starodubov Qırım ekspert merkezini idare ete. Onıñ qayd etkenine köre, ariza berip, konkurs ne qadar açıq keçirilgenini teşkerip baqmağa qarar aldı.

Diger namzetler daa belli degil. Ekspert toplulığında Devlet hızmetiniñ yolbaşçısı vazifesini qırımtatar halqınıñ Milliy Meclisi reisiniñ muavini Aslan Ömer Qırımlı ala bilecegini tüşüneler. Bunıñnen beraber, Qırımlınıñ özü Qırım.Aqiqat mühbiri ile telefon qonuşmasında konkursta iştiragi aqqında izaat bermege red etti.

Meclis reisi Refat Çubarov da muavini bu vazifege namzet olaraq konkursta iştiraq etkeni aqqında sualge cevap bermedi. Çubarovnıñ qayd etkenine köre, Milliy Meclis işbu konkursta meclis temsilcisiniñ iştiragi meselesini muzakere etmedi.

Tafsilâtlı malümatnı Qırım.Aqiqatnıñ "Qırım meseleleri boyunca Devlet hızmetiniñ yolbaşçısı kim olacaq?" maddesinde tapa bilesiñiz.

Qırım Muhtar Cumhuriyeti, Aqyar ve vaqtınca yerini deñiştirgen şahıslar meseleleri boyunca Devlet hızmeti avgust 5-de teşkil etildi.

Qırım meselelerinen oğraşacaq icra ükümetiniñ mahsus organnıñ teşkil etilmesini «Ukrainanıñ vaqtınca işğal etilgen territoriyasında grajdanlarnıñ aq-uquqları ve serbestliginiñ temin etilmesi ve uquq nizamı aqqında» qanunı belgiley.

Bu müessiseniñ yolbaşçı vazifesine namzetler konkursı Devlet Hızmeti teşkil etilmesinden bir aydan soñ ilân etildi.

XS
SM
MD
LG