Qırımtatar halqı yarımadanıñ Rusiye Federatsiyasına qoşulmasından soñ Ukrainada arz etmegen şeylerni bile aldı.
Bu aqta Rusiye Tışqı İşler Nazirliginiñ reisi Sergey Lavrov İTAR-TASS agentligine bergen intervyüsında bildirdi.
Lavrov Qırımda «referendum» sanalaştırılmasınıñ mümkün olmamasını ayırıca qayd etti.
«Bunı o vaqıt yarımadada çalışqan jurnalistler de, şu cümleden ecnebiy mühbirler de qayd eteler, – dep bildirdi Rusiye TİN reisi. – Elbet, adamlarnıñbir gruppası, hususan qırımtatar Milliy Meclisi reberliginiñ bir qısımı, Qırımnıñ Rusiyege qoşulmasından memnün degil. Amma şimdi qırımtatar halqı Ukraina devletiniñ içinde olıp arz etip olamağan bile şeyni – til statusı ve topraq amnistiyasını aldı».
Nazirniñ işandırğanına kore, qırımtatarlar ve yarımadanıñ diger milletleri arasındaki munasebetlerine kerginlikni qoşqan meseleler yoq etile.
«Devletimiz anda (Qırımda – muar.) qan tökülmesine, «maydannıñ» tekrarlanmasına ve bundan soñ (Ukrainanıñ – muar.) şarqiy cenüpte yüz bergen cenkke yol bermedi», – dep bildirdi Lavrov.
Qırımtatar halqınıñ lideri Mustafa Cemilevge kibi işğal etilgen Qırımğa kirişi yasaq olunğan Qırımtatar halqınıñ Milliy Meclisiniñ reisi Refat Çubarov Qırımda insan aqlarınıñ qorçalanması boyunca halqara nezaretniñ teşkil etilmesini maqsatqa uyğun kibi saya.
Refat Çubarov hatırlattı ki, Qırım işğal etilgen soñ, yarımadada insan aqları, hususan qırımtatar halqınıñ aqları kütleviy şekilde bozula: evlerde tintüvler keçirile, adamlar soravlarğa çekile, taqip etile.
Çubarov, Qırımnıñ bugünki ükümet maqsatlarına irişmek içün, suniy şekilde Qırım sakinlerini din ve millet mensüpligine köre bir-birine qarşı etebileceginiqayd etti. Meclis reisiniñ fikirince, boyle areketler qırımtatarlarnı tizilgen struktura olaraq yoq etmek içün yapıla.
2014 senesi, mart 16-da Qırım ve Aqyar territoriyasında yarımadanıñ statusı aqqında referendum keçirildi, onıñ neticelerine esaslanıp, Rusiye Qırımnı öz erkânına kirsetti. Ne Ukraina, ne Avropa Birligi, ne de Amerika Qoşma Ştatları bu rey berüvni qabul etmedi, ve Rusiye Qırımnı işğal etti, dep sayalar.
