Sentâbr 14-ne tayinlengen Qırım Devlet Şurasına saylavlar Qırımnıñ zapt etilüvi ve işğalini qanunğa uyğunlaştırmaq içün yapılğan bir ıntıluvdır.
Bu aqta Qırım.Aqiqat içün berilgen izaatta Ukraina Nazirler Kabineti yanındaki Qırım meseleleri Bölüginiñ yolbaşçısı, qırımtatar halqınıñ Milliy Meclisi reisiniñ muavini Aslan Ömer Qırımlı bildirdi.
Onıñ qayd etkenine köre, bu saylavlarğa bir şey bağlı degil, saylavlarnıñ neticeleri ise, iç bir şeyge tesir etmezdir.
«Bellesem, teşkilâtçılar, güya demokratik olğan saylavlar vastası ile yañı ükümetke qol tutmağan Qırım sakinlerine qarşı yapılğan cinayetlerniñ üstüni örtmek içün, saylayıcılarnıñ sayısı ve saylavlar neticelerini qalplıq etecektirler. Qırımtatar Milliy Meclisi, diger demokratik müessiseleri kibi, bu saylavlarnı qabul etmey», - dep qayd etti Aslan Ömer Qırımlı.
Sentâbr 14-de Ukrainanıñ vaqtınca işğal etilgen territoriyasında Rusiye Federatsiyasınıñ qanunına binayen Qırım ve Aqyar şeeriniñ qanunlar çıqarma organlarına saylavlar ve yerli saylavlarınıñ teşkil etilmesi planlaştırıla.
Ukraina Baş Prokuraturasında bildirgenlerine köre, Ukrainanıñ vaqtınca işğal etilgen territoriyasında Qanunğa uymağan ükümet organlarını teşkil etmek maqsadınen saylavlarnıñ keçirilmesi aqiqaten devlet ükümetiniñ zapt etülüvi ola.
Böyle areketler içün 10 yılğa azatlıqnan marum etüvi közde tutula.
Böyle munasebet ile, Ukraina Baş Prokuraturasınıñ bildirgenine köre, Qırımda qanunğa uymağan saylavlarnı teşkil etken şahıslarğa qarşı cinaiy işler açılacaq ve bu şahıslarnı tapmaq ve cinaiy mesüliyetke celp etmek içün areketler yapılacaqtır.
