Qırımda qırımtatarlarnıñ evlerinde tintüvler ep keçirilmekte. Sentâbr 10 künü Boğurça qasabasında ağa-qardaş Nariman ve Ekrem Ametovlarnıñ evlerinde tintüvler keçirildi.
«İşbu şahıslar tintüv ile saba saat 5-te keldi, şeadetnamelerni köstermediler,buyruqnı kösterdiler, amma onı fotoğa çekmege bermediler. Tintüv vaqtında tanışlarğa ya da adliyecige telefon açmağa bermey ediler», – dep añlattı Qırım.Aqiqat saytına Narimannıñ babası İdris Ametov.
Tintüv neticesinde cep telefonnı, eki bilgisayarnı, em de sanki yasaq etilgen edebiyatnı – «Musulmannıñ qalesi» ve «İslâm boyunca tedaviylev» kitaplarnı tutıp aldılar.
Yaşlarnı Aqmescitke sorğuğa alıp kettiler, mında olarnı iş kününiñ soñuna qadar tuttılar, soñra senetni alıp, yiberdiler.
«Olarğa iç bir zarar ketirmegenleri aqqında senetni aldılar, bilgisayarlarnı öyle de qaytarmadılar, saat 18-ge yaqın yiberdiler», – dep añlattı İdris Ametov.
Belli olğanı kibi, Qırımda soñki aftaları qırımtatarlarnıñ evlerinde ve diniy oquv yurtlarında tintüvler sıq rastkelgen bir al oldı. İşğal etilgen Qırımnıñ akimiyeti musulmanlarnıñ evlerinde ve medreselerde tintüvlerniñ keçirilüvi uquqniñ bozuluvı olaraq tanıdı.
Yaqında qırım akimiyeti Qırım musulmanları diniy idaresiniñ yolbaşçılığı ile körüşti. Mında Müftiyat müminlerniñ aqlarınıñ bozuluvı aqqında öz memnüniyetsizligini bildirdi.
