Rusiyeli sıñırcılar tarafından yaqalanğan Qurultaynıñ teftiş komissiyası reisi Ali Özenbaş endi azatlıqta. Şimdiki vaqıtta o Kiyevge ketken trende buluna.
Ali Özenbaş Qırım.Aqiqat mühbirine aytqanı kibi, onı yaqalağan soñ, üç saat tintüv ve soravnı keçirdiler.
«Laqırdı etkende, men «Rusiyege qarşı» olğanımda qabaatladıla. Men soradım, ne içün böyle belleyler. Tekmil cevap bermediler. Men qabaatlanğan, yaqalanğan ya da nasıl bir diger statusta bulunğanım aqqında sualge cevap bermediler», – dedi Özenbaş.
Onıñ sözlerine köre, sıñırcılar qaba davrandılar: yüznen aşağı attılar, qolunı yaradılar. Kiyevge kelgen soñ, Ali Özenbaş tibbiyet yardım soraycağını ayttı.
Özenbaşnıñ aytqanına köre, yaqalanuvnıñ esas maqsadı, onı qırımtatar cemaatçılığının faal azası olğanı içün qorquzmaqtır.
Qırım.Aqiqat bildirgeni kibi, milliy areket iştirakçisini «Aqmescit-Lvov» treninden alıp tüşürdiler, ve nasıldır kamerağa qapattılar. Sıñırcılarnıñ Özenbaşnı yaqalamağa sebepleri yoq, onı özleri ayttılar.
Qurultaynıñ teftiş komissiyası reisniñ sözlerine köre, o Lvovğa kete edi, anda qırımtatar halqınıñ yetekçisi Mustafa Cemilev ve halq deputatı Refat Çubarov ile körüşmek kerek edi.
