Rusiye baş naziri Dmitriy Medvedev «Yedinaya Rossiya» firqasınıñ azaları ile körüşüvde Qırım işğali devam etecegini ve bu al ileride: «ebediyen olacaq, bunı bütün siyasetçiler añlamaq kerek» olğanını bildirdi – dep qayd ete Medvedevniñ sözlerini RİA Novosti.
Dmitriy Medvedev Rusiye mevamı adiy olğanını qayd etti: «Ukrainada tınçlıq olacağını isteymiz – bu eñ müimidir, ve bu maqsatqa irişmek içün memleketimiz oña bağlı olğan er şeyni yapmalı dep tüşünem».
«Bunıñ ile bu sene olıp keçken siyasiy aqiqat bardır. Şu cümleden, Qırımnıñ Rusiye Federatsiyasına qaytarıluvı da bar. Biz sizlernen yetişken insanlarmız ve Qırımda olğan adiseler ve Rusiyeniñ Qırım ile birleşüvi ebediyen bir al olğanını añlamalımız, bunı siyasetçilerniñ episi bilmeli: memleketimizde ve diger devletlerde yaşağanlar da»,– dedi Rusiye baş naziri.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
