Link açıqlığı

Saatnıñ esas haberi

Qırım qoruyıcıları Tankovoye gimnaziyasında neni qıdırdılar?


Bağçasaray – Sentâbr 9 künü Tankovoye gimnaziya-internatında neler olıp keçkeni aqqında malümat pek az. İçtimaiy ağlarda tintüv aqqında peyda olğan malümattan soñ, bunı ögrenmege kelgen mühbirlerni mektep azbarına yibermediler. Faqat çeşit qaynaqlar bildirgeni kibi, mektepte tintüv ötkerilgen ve qanun bozuluvları boyunca protokollar tizilgenini tasdiqlaylar.

Gimnaziyağa kelgen mühbirlerni körip qalğan qaravul kimgedir telefon etip başladı. Birazdan qapu ögüne eki qadın çıqtı. Olardan birisi oquv-terbiyeviy işler boyunca mektep müdiriniñ muavini olaraq özüni tanıtqan Nadejda Udovitsa edi.

Onıñ sözlerine köre, gimnaziyada tintüv ötkerilmedi. Sadece, sanitar epidemiologik ve diger nezaret organlarnıñ tarafından teşkerüv keçirildi, bu da, yañı şaraitlerde normal bir şey. Rusiyede yasaq etilgen kitaplarnı qıdırmağa keldilermi sualge, müdir muavini bu aqta iç bir şey bilmegenini ayttı.

Mektep kitaphanesinde yasaqlanğan kitaplar tapıldı

Qoruyıcı organlarınıñ hadimleri olması mümkün, adiy urbada bir qaç adam Tankovoye gimnaziyasına tintüv ötkermek içün kelgenlerini Qırım.Aqiqatqa ana-babalar bildirdiler.

Oquv yurtnıñ ocaları adlarını aytmamağa rica etip, bunı tasdiqladılar. Onıñ sözlerine binaen, belgisiz şahıslar doğrudan-doğru kitaphanege yol aldılar, tintüv devamında Rusiye Federatsiyasında yasaq etilgen kitaplar cedveline kirgen üç diniy kitapnı taptılar.

Hadimlerniñ aytqanına binaen, bu kitaplar kitaphane fondunda yoq edi, olar nasıl etip peyda olğanını bilmeyler. Tintüv neticesinde protokol tizildi.

Talebelerniñ ana-babaları bu vaqialardan sebep ğayet qasevetleneleyer. Olarnıñ bildirgenine köre, «musafirler» bütün binanı dolanıp, balalarğa «şübeli» qırımtatar timsallerni alıp taşlamağa avale ettiler.

Sakinler: mektepniñ teşkerüvi – nevbetteki provokatsiya

Qırım.Aqiqat mühbirleri mektep müdiri Memet Kangiyevniñ fikirini ögrenip olamadılar. Başından telefon vastasınen bağlanğanda, tintüv aqqında haberni red etti, keççke telefon açmağa rica etti. Soñra, telefonğa asıl cevap bermedi.

Gimnaziyağa kelgen mühbirler de, müdirnen körüşip olamdılar. Qırım.Aqiqat ögrengeni kibi, müdir terciman sıfatında gimnaziyanıñ eki türk ocasınen birlikte Aqmescitke ketken. Ocalar, Qırımda ocalıq faaliyetini alıp barmağa aqları olğanını tasdiqlamağa kerek ediler.

Bağçasaray rayonı Tankovoye köyündeki istidatlı balalar içün gimnaziya-internat
Bağçasaray rayonı Tankovoye köyündeki istidatlı balalar içün gimnaziya-internat

Yerli sakinler teşkerüv nevbetteki provokatsiya, deyler. Çünki Tankovoye gimnaziyasında oquğan balalarnıñ yarısı ve hadimlerniñ ekseriyeti qırımtatarlardır. Olar Qırımnı «rusiyeli» olğanını tanımağanları içün, qoruyıcı organlar olarnı qorquzmağa isteyler.

Bağçasaray civarındaki Süren köyündeki istidatlı balalar içün gimnaziya-internat 1993 senesi teşkil etilgen edi. O, çoq milletli Qırımda istidatlı balalarnı oqutqan oquv yurtudır. Gimnaziya saytında bildirilgeni kibi, derslerniñ çoqusı ukrain, rus ve ingliz tillerinde ötkerile. Şimdiki vaqıtta internatta 150 bala oquy. Aqmescitte de bölügi faaliyet etip başladı.

Hatırlatamız, avgustnıñ 13-nde Aqmescite 3 medresede yasaq etilgen kitaplarnı qıdırıp, tintüvler ötkerildi.

XS
SM
MD
LG