İşğal etilgen Qırım akimiyeti Qırımda bir Müftiyat olacağını vade ete, – Qırım musulmanları Qurultayında saylanğan, yani Qırım musulmanları Diniy idaresi.
Bunı Qırım musulmanları Müftisi haci Emirali Ablayev yarımadada «Tavriya Müftiyatınıñ» meydanğa ketirilmesi muzakere etilgen «tögerek masadan» soñ bildirdi.
Sentâbrniñ 8-de olıp keçken körüşüvde Qırım musulmanları Müftisi haci Emirali Ablayev, Rusiye Müftiler şurasınıñ Reisi Ravil hazrat Gaynutdin, em de Qırım memurları ve arbiyleri bulundılar.
Haci Emirali Ablayev Kezlevdeki «Han-Cami» diniy cemiyetinen bağlı vaqialarnıñ muzakeresi aqqında tarif etti.
«Elbet de, bizler «Tavriya müftiyatınıñ» peyda olmasını muzakere ettik, akimiyet Qırımda bir Müftiyat – Qırım musulmanları Qurultayında saylanğan, yani Qırım musulmanları Diniy idaresi olacağını vade etti, ekinci organ olmaycaq, yalıñız Qırım Müftiyatınen çalışacaqlar. Bizler Kezlev vaqiaları, Kezlev camisiniñ zapt etilüvini muzakere ettik, akimiyet böyle bir şey imkânsız olğanını ayttı», – dep ayttı Müfti.
Rusiye Müftiler Şurasınıñ Reisi Ravil hazrat Gaynutdin Qırım musulmanları Müftisi haci Emirali Ablayevge tögerek masada iştirak etmek daveti içün teşekkürler bildirdi. Bu tögerek masa taraflar fikirlernen paylaşmağa azır olğanını kösterdi, – dep bildirdi Qırım musulmanları Diniy idaresiniñ matbuat hızmeti.
