Link açıqlığı

Smedlâyev: kütleviy tintüvlerdеn sebep Qırımdaki vaziyet kerginleşe bile


Qırımtatar qorantalarınıñ evlerinde kütleviy tintüvler yarımada sakinlerinde narazılıq köstermege isteklerini doğura bile.

Böyle bir fikirni qırımtatar milliy areket iştirakçisi, Qırımtatar Qurultayı Merkeziy saylav komissiyasınıñ reberi Zair Smedlâyev Qırım.Aqiqat mühbirine seslendirdi.

«Bugünde-bugün qırımtatarlarğa qarşı ve tek olarğa qarşı degil… alıp barılğan adaletsizlikke belli bir vaqıtqa qadar dayanacaqlar. Lâkin er bir adam onı tabanğa alıp taşlağanda, qollarını baylağanda, susıp oturmaycaq. Demek bir yerde ses-şamata köterilecek, narazılıqlar başlaycaq», – dedi o.

Smedlâyev Qırımda olğanlarnı yarımada vaziyetini kerginleştirmek ıntıluv olaraq tanıy.

«Saylavlardan soñ, demek, «B» planı olacaq – Qırımdaki vaziyetni kerginleştirmek. Ve birisi, bugünki künde qırımtatarlar Qırımda qalıp, şimdiki akimiyetnen yaşamaları mümkün, dep tüşünse, men yoq, dep aytarım. Aynısı ukrainler ve Qırımnıñ farqlı millet vekillerine ait», – bildire faal.

Qırım.Aqiqat bergen malümatqa binaen, soñki bir qaç afta devamında yarımadada qırımtatar qorantalarınıñ evlerinde tintüvler sıq-sıq ötkerilip başladı. Kütleviy tintüvler Seyitler rayonında olıp keçti.

Sentâbrniñ 9-da Bağçasaraydaki Büyük Süyren (Tankovoye) köyünde yerleşken «Qırımnıñ istidatlı balalar içün gimnaziya-internatına» tintüvnen keldiler. Oquv yurt hadimleriniñ aytqanına köre, kelgenler doğrudan gimnaziya kütüphanesine yol alıp, anda yasaq etilgen edebiyat cedvelindeki üç kitapnı taptılar. Tintüv neticelerine köre, memuriy protokol tizildi.

Sentâbrniñ 8-de ise Qırım faali ve bloger Yelizaveta Bogutskayanıñ evinde de tintüv keçirildi.

Avgust 13-te Aqmescitniñ üç musulman oquv yurtında tintüv keçirilgen edi.

XS
SM
MD
LG