Link açıqlığı

Bağçasaray rayon gimnaziyasında tintüv keçirildi


Bağçasaraydaki Büyük Süyren (Tankovoye) köyünde yerleşken «Qırımnıñ istidatlı balalar içün gimnaziya-internatına» sentâbrniñ 9-da tintüvnen keldiler. Adiy urbağa kiyingen eki er kişi oquv yurtında tintüv keçirmege keldi.

Bunı gimnaziya talebeleriniñ ana-babaları Qırım.Aqiqat saytına bildirdiler.

Bu malümatnı oquv yurtınıñ hadimleri de tasdıqladılar. Olarnıñ aytqanına köre, kelgenler doğrudan gimnaziya kütüphanesine yol alıp, anda yasaq etilgen edebiyat cedvelindeki üç kitapnı taptılar. Tintüv neticelerine köre, memuriy protokol tizildi.

Hadimler eminler, tapılğan kitaplarnı aselet qoydılar, çünki bundan evel kütüphanede bunıñ kibi edebiyat olmağan edi.

Talebelerniñ ana-babaları pek qasevetleneler. Olarnıñ aytqanına köre, balalar qorqalar. Dersler yekünlendi, balalar mektepte yüreler, lâkin olarnı milliy qırımtatar timsallerini alıp taşlamağa zorladılar.

Qırım.Aqiqat saytı oquv yurtınıñ müdiri Memet Kangiyev ile bağlandı, lâkin o er şeyni inkâr ete.

İşğal etilgen Qırımda qırımtatar qorantalarında, musulman oquv yurtalarında, em de faallerniñ evlerinde tintüvler sıq-sıq ötkerilip başladı.

Böylece, medreselerde tintüvler keçirile – yasaq etilgen edebiyatnı qıdıralar. Avgust 13-te Aqmescitniñ üç musulman oquv yurtında tintüv keçirilgen edi.

Sentâbrniñ 8-de ise Qırım faali ve bloger Yelizaveta Bogutskayanıñ evinde de tintüv keçirildi.

XS
SM
MD
LG