Link açıqlığı

Sentâbr 14-ne keçirilmesi belgilengen saylavlarğa qırımtatarlarnıñ 20-30 fayızı baracaq.

Bunı Qırımtatar Milliy Meclisiniñ reis muavini Nariman Celâl Qırımnıñ öz başına ilân etilgen akimiyet vekilleriniñ qırımtatarlarnıñ faal sürette Rusiye pasportlarını aluv ve saylavlarda iştirak etmek niyetleri bar olğanı aqqında aytqanlarını izaatlap, Qırım.Aqiqat saytına bildirdi.

Onıñ aytqanına köre, Qırım akimiyeti qırımtatar saylayıcılarınıñ faal iştiragine ümüt etmemek kerek.

«Men taqdim etilgen statistikanı red etmeycem, 100% Rusiye pasportını alsa da. Mence, yalıñız tecribesiz insanlar berilgen pasportlarnıñ sayısını saylav bölüklerinde qırımtatarlarnıñ iştiragi ile qıyaslay bileler. Bu külkünçli ve tecribesizdir. Adamlar pasport alğanlarını añlaymız, bunıñ bam-başqa sebepleri bar, mal-mülk, qoranta munasebetleri, lâkin saylavlarda iştirak etüv degil. Ekinciden, men keçken saylavlarda iştirak etken qırımtatarlarnıñ sayısı saylav bölüklerine keleceginen razı degilim. Saylavlarğa, belki de, 20-30% kelir», – dep ayttı Celâl.

Onıñ qayd etkenine köre, Qırımtatar Milliy Meclisi saylavlarda iştirak etmese de, semetdeşlerine rey bermekten vazgeçmege aytmağan edi.

«Biz er daim inandırmağa tırışamız. Lâkin bu sefer bizler yalıñız açıq sürette qararımıznı aytıp, semetdeşlerimiznen ananeviy subet usullarını qullanmayıq. Bizler bu sefer saylavlarda iştirak etmemek kerekligini ve bunıñ sebebini añlattıq. Qalğanı, er kesniñ şahsiy qararıdır», – dep qayd etti Celâl.

Lâkin, Meclis reisiniñ muavini emin ki, qırımtatarlarnıñ ekseriyeti Meclis qararına qulaq asacaq, daa bir qısım ise saylavlarğa barıp, yalıñız yerli şura içün rey berecek, «Devlet şurası» deputatlarını ise saylamaycaq.

Qırım saylav komissiyasınıñ reisi Mihail Malışevniñ qırımtatarlarnıñ vaqtından evel rey bermek istekleri aqqında aytqanlarını Celâl külkünçli dep adladı.

«Qırımtatarlarnıñ belli bir sayısı bara bile, kerçekten. Lâkin saylavlar künü olarğa bir şey yapacaqlar, qorquzacaq ve ilâhre kibi şeyler külkünçlidir», – dep ayttı Meclis reisiniñ muavini.

Bunıñnen beraber, Qırımnıñ milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reis muavini Nadir Nomanov bildirdi ki, qırımtatarlarnıñ 90% ziyade Rusiye vatandaşını pasportını elde etti, qalğanları – pasport almaq içün vesiqalarını teslim ettiler.

Qırım saylav komissiyasınıñ reisi Mihail Malışev bildirdi ki, qırımtatarlar toplu yaşağan yerlerde vaqtından evel rey bermek içün bayağı ariza bar. Böyle añlatalar – bazıları olarnı saylav bölüklerinde körmelerini istemeyler. Olar keleler ve şimdi bile aqqını qullanalar.

XS
SM
MD
LG