İşğal etilgen Qırım akimiyeti bir sıra devlet obyekti, ilk evelâ, şifahane-kurort kompleksini devletleştirmege azırlana.
Bunı Qırımnıñ öz başına ilân etilgen baş naziri Sergey Aksönov jurnalistlerge bildirdi, dep haber ete Qırım «akimiyetiniñ» ruporı Krıminform saytı.
Onıñ aytqanına köre, satış parası qırımlılarnıñ bank emanetlerini ödemek içün sarf etilecek.
O, şunı qayd etti ki, birinciden «Privatbank» müşterilerine para qaytarılacaq.
«Bizler devletleştirilecek obyektlerniñ cedvelini tizemiz», – dep ayttı Aksönov.
Onıñ bildirgenine köre, eñ evelâ şifahane-kurort kompleksiniñ obyektleri devletleştirilecek.
Sentâbr 3-te Qırım «parlamenti» ukrain iş adamı İgor Kolomoyskiyge ait olğan bütün mal-mülkini devletleştirmege qarar aldı. İşbu cedvelge 82 obyekt kirdi.
