Link açıqlığı

Bazı qırımtatarlar sentâbr 14-ne keçirilmesi belgilengen Qırım «Devlet şurası» saylavlarında vaqtından evel rey bermege isteyler.

Bunı Qırım saylav komissiyasınıñ reisi Mihail Malışev bildirdi, dep haber ete KİA.

«Toplu yaşağan yerlerde vaqtından evel rey bermek içün bayağı ariza bar. Böyle añlatalar – bazıları olarnı saylav bölüklerinde körmelerini istemeyler. Olar keleler ve şimdi bile aqqını qullanalar», – dedi o.

Bunıñnen beraber, Qırımnıñ milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reis muavini Nadir Nomanov bildirdi ki, qırımtatarlarnıñ 90% ziyade Rusiye vatandaşını pasportını elde etti, qalğanları – pasport almaq içün vesiqalarını teslim ettiler.

«Qırımtatarlar saylavlarğa baracaqlar. Meclis alıp barğan siyaset qırımtatarlarğa akimiyet organlarında tolusınen temsil etilmege imkân bermeycek. Lâkin bu saylavlarğa qulaq asmamağa kerek olğanını ifade etmey», – dep ayttı o.

Bundan evel berilgen malümatqa köre, sentâbr 14-te saylavlarda iştirak etmek içün rus, ukrain ve sovet pasportını köstere bilesiñ. Qırım saylav komissiyasınıñ reisi Mihail Malışevniñ malümatına köre, sentâbr 8-14 künleri Federal migratsion hızmet organları saat 21.00 qadar çalışıp, Rusiye pasportlarını berecekler. Bundan ğayrı, rey berüv künü cedvelde özüni tapmağan adam ariza yazıp, aqqından faydalana bile. Mahkemege barmağa acet yoq.

Qırımtatar Milliy Meclisi Qırımda keçirilecek saylavlarnı boykot etmege çağıra, milliy lider Mustafa Cemilev qırımtatarlarnıñ saylavlarda iştirak etüvi – «kollaboratsioniz yolu» olğanını ayttı.

XS
SM
MD
LG