Ukrainanıñ sabıq prezidenti Leonid Kuçma qırımtatarlarnıñ yarımadada Qırımnı işğal etken Rusiyeden ziyade aqları bar olğanını bildire.
Bu aqqında o Çernigov tehnologik universitetiniñ studentleri ile körüşüvde ayttı, dep haber ete UNİAN.
«Rus territoriyası» aqqında aytsaq, Qırım kimge mensüp olğanını bilemiz, Rusiyege degil. Tatarlarnıñ, tamır halqnıñ olaraq, daa ziyade aqları bardır», – dep ayttı o.
Leonid Kuçmanıñ fikirince, qırımtatarlar demografik ceetten yarımadada akimiyet organlarını şekillendirecekler, soñra ise Türkiyege qoşulmaq içün referendum keçire bileler.
Rusiye Qırımnı işğal etip, ğalip çıqmadı, dep tüşüne o.
Eñ evelâ, Rusiye bu topraqnı zarur olğan şeylernen temin etip olamaz. Sabıq prezidentniñ aytqanına köre, Ukrainadaki vaziyet Rusiyeden yahşı olsa, o vaqıt Qırım Ukrainağa keri qaytacaq.
Lâkin o Qırım – Rusiye Federatsiyasınıñ bir qısmı degen laflarnen iç bir vaqıt razı olmaz.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
