Sentâbrniñ 11-de Lvovda «Muzıkalnıye kollaboratsii» ukrain-qırımtatar muzıkalı leyha ömürge keçirilip başlay.
Leyhanıñ maqsadı qırımtatarlar ve ukrainler arasında medeniy bağlarnı saqlap qalmaq ve arttırmaqtır, dep aytalar teşkilâtçılar.
«Yarım yıldan berli Qırım işğal altında yaşay, Qırımnı Ukrainadan ayırmaq içün informatsion ve medeniy ceetten bizni biri-birinden çetleştirmege tırışalar. Bizler medeniy alâqalarnı coysaq, olar maqsadlarına irişecekler», – aytıla ilânda.
Leyhada İgor Gnidin (Lvov), Andrey Kohan (Lvov), Usein Bekirov (Qırım) iştirak etecekler.
Programma esasında Usein Bekirovnıñ eserleri qullanılacaq – halq qırımtatar muzıkası ve caz birleştirüvi.
Leyhanı «Musiclive» prodüser şirketi «Krım SOS» cemaat teşebbüsiniñ qol tutuvı sayesinde amelge keçire.
Tedbir saat 20:00 Lvovdaki Valovaya soqağı, 18a, «Ğayeler müzeyinde» («Müzey idey») başlanacaq.
