Link açıqlığı

Saatnıñ esas haberi

Qırım musulmanları Diniy idaresi Rusiye müftiler Keñeşine kirmedi


Qırım musulmanları Diniy idaresiniñ vekilleri Rusiye müftiler Keñeşi terkibine kirmeycekler. Bunı sentâbr 8-de şura reisi Ravil Gaynutdin bildirdi, – dep haber ete öz başına ilân etilgen Qırım akimiyetiniñ «ruporı» «Krıminform» saytı.

Sentâbr 21-ne keçirilmesi belgilengen qurultayda Rusiyeniñ Avropa qısım musulmanları Diniy idaresi Rusiye Federatsiyası musulmanları Diniy idaresi adını alacaq eken.

«Bizler Qırım musulmanları Diniy idaresini Diniy idare ve Rusiye müftiler şurasına davet etmekniñ tarafdarı degilmiz. Eñ esası, bizler müftinen biri-birini çoqtan bilemiz, çoqtan işbirlik tutamız», – dep ayttı Gaynutdin.

İleride, reisniñ aytqanına köre, Rusiye müftiler keñeşi Qırımdaki musulman oquv yurtlarınıñ inkişafına yardım etmege azır.

«Bizler yardım kösteremiz ve ileride de musulman oquv yurtlarına qol tutmağa azırmız. Qırımdaki musulman oquv yurtlarına litsenziya almağa yardım etecekmiz. Bizler bu oquv yurtlarına zarur olğan nizamnamelerni de azırlamağa azırmız», – dep ayttı Rusiye müftiler Keñeşiniñ reisi.

Qırım musulmanları Diniy idaresi ve Rusiye müftiler Keñeşi arasında ilerideki işbirlik Rusiye prezidentiniñ Qırımdaki vekâletli temsilcisi Oleg Belaventsevniñ Qırımnıñ öz başına ilân etilgen baş naziri Sergey Aksönov ile körüşüvinde muzakere etildi.

Ravil Gaynutdin bildirdi ki, «Qırım musulmanları Diniy idaresi Qırımda barışıq ve amanlıq olması içün işbirlik tutmağa azır».

Gaynutdinniñ qayd etkenine köre, akimiyet vekilleri ile körüşüvde Qırım yarımadasında barışıq saqlap qalması, em de dinler ve milletler arasında işbirlik baqıldı.

XS
SM
MD
LG