Qırım faali ve bloger Yelizaveta Bogutskayanı Aqmescit rayonınıñ «politsiya» rayon bölüginden yiberdiler. Bugün, sentâbr 8-de, saba onıñ evinde tintüv keçirildi.
Yelizaveta Bogutskaya Qırım.Aqiqat saytına bergen malümatına köre, tintüv ve «politsiyada» devam etken sorğu sebebi onıñ mayıs 3-te Qırımğa kiriş noqtasında Mustafa Cemilevni qarşılav tedbirinde iştiragi oldı.
«Biz mında kelgen soñ, men evde Molotov qarışmalarnı, özek bombalarnı azırlayım degen laflar olmadı. Esasen menim Rusiye Federatsiyasınıñ devlet sıñırında bulunmam aqqında ayta ediler. Em de bilgisayarımda milletlerara dava doğurğan malümatlar barmı. Bizde iç bir vaqıt milletlerara dava olmağanını, biz epimiz biri-birini sevemiz, dep ayttım», – dep tarif etti Yelizaveta Bogutskaya.
Onıñ bildirgenine köre, sorğu belli bir cinaiy taqiqat çerçivesinde keçirildi.
«Bu cinaiy iş çerçivesinde edi. Qırım ile sıñırnı keçkende atış eşitilgen eken, birisi başqasınıñ qolunı tarttı, ve Krupskiy soyadı olğan bir militsionerni aqaretlegen ekenler. Krupskiyniñ torunıdır, onıñ içün o qadar qabartalar. Krupskiy ve onı tartqan qırımtatarlarğa iddialarım barmı-yoqmı, dep soradılar», – dedi o.
Başqa iddialar da oldı, – dep ayttı Qırım faali. Uquq qoruyıcılarnıñ malümatına köre, Yelizaveta Bogutskayanıñ qomşuları oña şikâyet eteler.
«Menim Facebooktaki yazılarım ekstremizmge oşap ketkenlerini ayttılar. Bundan sebep menim Rusiye Federatsiyasına munasebetimni begenmegen qomşularım ariza yazğan ekenler. Bizler ketkende, qomşulardan biri bizni ozğardı. O, külümsiredi, quvandı. Men oña el salladım. Menim Rusiye, Rusiye Federatsiyasınıñ prezidenti, Rusiye vatandaşlarına munasebetim aqqında soradılar, olarnı aqaretlemeyimmi kibi sualler oldı», – dedi Bogutskaya.
Qırımlı onıñ sorğusı Mustafa Cemilevni qarşılav taqiqatınen bağlı olğanında şübelene. Yelizaveta Bogutskayanıñ aytqanına köre, esas sebep – Qırım «Devlet şurasınıñ» yaqınlaşqan saylavlarıdır.
«Olar men ealiniñ belli bir qısmına start ya da finiş bere bilem, dep tüşüneler. Aksönov qırımtatarlar rey berecegini ayta. Er kes rey berecek, er kes «Yedinaya Rossiya» firqasına qol tutacaq. Faal olğan adamlarnı saylavlarğa keder etmesinler dep, çetleştirmege tırışacaqlar», – dep ayttı Yelizaveta Bogutskaya Qırım.Aqiqat mühbirine.
Sentâbrniñ 8-de saba Qırım faali ve bloger Yelizaveta Bogutskayanıñ evine arbiyler kelip, tintüv keçirip başladılar. Faalniñ aqayı Qırım.Aqiqat saytına bergen malümatqa köre, evlerine arbiyler silâlılarnen beraber keldiler. Narkotik, yasaq etilgen edebiyat, silâ qıdırğan ekenler.
Tintüv sebebi Yelizavetanıñ mayıs ayında Ermeni Bazarda qırımtatarlarnıñ lideri Mustafa Cemilevni qarşılav tedbirinde iştiragi oldı.
Yelizaveta Bogutskaya Liza Bogutski tahallüsini qullanıp, içtimaiy ağlarda ve farqlı neşirlerde, şu cümleden Qırım.Aqiqat saytında, Qırım işğaline qarşı maqalelerni bastıra edi.
