Link açıqlığı

Qırımtatarlarnıñ saylavlarda iştirak etüvi – «kollaboratsionizm yolu», kibi fikirni qırımtatar halqınıñ lideri Mustafa Cemilev QHA haber agentligine bildirdi.

«Yazıq ki, bu yolnen ketken bazı insanlar tapıldı, Allah olarnı bile. Soñra biri-biriniñ betine nasıl baqacaqlar, bilmeyim... Maña köre, halqımıznıñ ekseriyeti Qırımtatar Milliy Meclisiniñ qararına köre areket etecek», – dep qayd etti Cemilev.

Onıñ fikirince, şimdi akimiyetnen iş tutqanlar halq içün dep, özüni qorumağa tırışacaqlar.

«İlerileycekler (akimiyette, - muarrir) halq menfaatları içün dep aytalar... Şimdi birisi aytmaz: «Men satqınım, satıldım, özüne yahşı bir yer qıdıram, onıñ içün anda ketem (akimiyetke, - muarrir)». Er kes «halq içün dep» areket etecek», – dep ayttı Cemilev.

Sentâbr 6-da Aqmescitteki Qırım Ukrain akademik muzıkalı drama teatrinde «Qırımtatarlarnıñ Qırımda zemaneviy basamaqtaki al-vaziyeti aqqında» Bütünqırım konferentsiyası olıp keçti.

Konferentsiya teşkilâtçıları «Adalet», «İnkişaf», «Qardaşlıq-Qarasuv» ve «Namus» qırımtatar halqınıñ aqsaqallar keñeşi oldılar. Teşkilâtçılar arasında – Qırım Devlet şurasınıñ spiker muavini Remzi İlyasov.

Konferentsiya iştirakçileri semetdeşlerine muracaatta bulunıp, sentâbrniñ 14-ne keçirilmesi belgilengen Qırım devlet şurasınıñ saylavlarında iştirak etmege çağırdılar. Qırımtatar Milliy Meclisi ise olarnı boykot etmege çağıra.

XS
SM
MD
LG