Link açıqlığı

Qırım faali Bogutskayanı politsiyada 4 saat tutalar


Evinde tintüv keçirilgen soñ politsiya hadimleri alıp ketken Qırım faali ve bloger Yelizaveta Bogutskaya 4 saat devamında rayon bölüginde buluna.

Qırım.Aqiqat saytınıñ mühbiri bildire ki, rayon bölüginiñ binası yanında bir qaç jurnalist ve televizion taqımları bulunalar. Olarğa uquq qoruyıcıları Bogutskayanıñ yaqalanuvı boyunca bir de bir izaatlar bermeyler.

Matbuat vastalarınıñ hadimlerinen beraber rayon bölügi yanında faalniñ aqayı Oles de buluna. O, Yelizavetanıñ adliyecisinden haber bekley. Faalniñ menfaatlarını adliyeci Emil Kürbedinov qoruy.

Qırım.Aqiqat Qırım İçki işler nazirliginden izaatlar berilmesini istedi, lâkin vaziyetni birazdan izaatlamağa vade ettiler.

Sentâbrniñ 8-de saba Qırım faali ve bloger Yelizaveta Bogutskayanıñ evine arbiyler kelip, tintüv keçirip başladılar.

Yelizaveta Bogutskaya Liza Bogutski tahallüsini qullanıp, içtimaiy ağlarda ve farqlı neşirlerde, şu cümleden Qırım.Aqiqat saytında, Qırım işğaline qarşı maqalelerni bastıra edi.

XS
SM
MD
LG