Bugün saba evinde tintüv keçirilgen soñ Aqmescit rayonınıñ politsiya rayon bölügine ketirilgen Qırım faali ve bloger Yelizaveta Bogutskayağa onıñ adliyecisi keldi, dep haber ete Tsentr jurnalistskih rassledovaniy.
«Yelizavetanıñ adliyecisi keldi, o bina araba qapusına kirdi, lâkin onı körip oldımı-yoqmı belli degil», – dep bildire neşir mühbiri.
Sentâbrniñ 8-de saba Qırım faali ve bloger Yelizaveta Bogutskayanıñ evine arbiyler kelip, tintüv keçirip başladılar. Qırım.Aqiqat saytına faalniñ aqayı bergen malümatqa köre, evlerine arbiyler silâlılarnen beraber keldiler. Narkotik, yasaq etilgen edebiyat, silâ qıdırğan ekenler.
Tintüv sebebi Yelizavetanıñ mayıs ayında Ermeni Bazarda qırımtatarlarnıñ lideri Mustafa Cemilevni qarşılav tedbirinde iştiragi oldı.
Tintüvden soñ arbiyler bilgisayarlarnı alıp kettiler, Yelizavetanı ise rayon bölügine ketirdiler.
Yelizaveta Bogutskaya Liza Bogutski tahallüsini qullanıp, farqlı neşirlerde, şu cümleden Qırım.Aqiqat saytında, Qırım işğaline qarşı maqalelerni bastıra edi.
