Aqmescit– Birinci qırımtatar ATR telekanalı 9 yıllığını qayd etti. Bu sebepten Qırım paytahtında bayram kontserti ötkerildi. Kanalnı doğğan kününen hayırlamaq içün yarımadanıñ çeşit köşelerinden seyirciler keldiler.
Sentâbr 6 künü, ATR kanalı yerleşken azbarda yüzlernen adamlar toplaşp başladı. Ekseriyeti balalarnen keldi. Bazılarnıñ yüzlerinde «Men ATR-ni sevem» kibi yazılarnı körmek mümkün. Telekanal mühlisleri regionnıñ çeşit köşelerinden teşrif buyurdılar: Aqmescit, Yalta, Aqyar, Kefe, Sudaq, Keriç, Canköy ve diger şeerlerden.
Tamam mında çadırlar qurulıp, çeşit qırımtatar eşyalar, edebiyat, milliy urba nümüneleri satıldı. İstegen er kes içün çölmekçilik dersleri teşkil etildi, yaşlar «Küreş» yarışlarında iştirak etip oldılar. Aynı zamanda sanada icadiy tögerekler, qırımtatar artistleri çıqışta bulundılar.
Qırım.Aqiqat subetleşken adamlar, bu kibi bayramlar halqnı birleştire, ATR telekanalı ise, er kes içün bir ayırılmaz parça olğanını ayttılar.
ATR-niñ icraiy müdiri Şevket Memetov aytqanı kibi, 9 yıl – bu büyük bir raqam olmasa da, telekanal içün büyük bir tarih. «ATR telekanalı – bu hususiy kanal. Bu, 9 yıl içinde ve bugünde bugün 3 tilde - ukrain, qırımtatar, rus tillerinde yayınlağan yekâne kanaldır», - dep bildirdi o Qırım.Aqiqatqa.
Onıñ sözlerine köre, ATR büyük bir mediaholding, onıñ terkibine Lâle balalar telekanalı, «Meydan» ve «Lider» radiostantsiyaları, «15 minut» internet-neşiri kire. Bunen beraber, bediy ve vesiqalı filmlerni çıqarğan prodakş-studiya teşkil etildi. «Bizim baylağımız «Haytarma» filmidir», - dey Memetov.
İcraiy müdir ATR-niñ vaziyeti etrafında olğan çeşit öşeklerni red eti, kanal ileride de seyircilerni yayınlarınen sevindirecek, dedi.
«Biz Qırımda yaşap, inkişaf etip, güllep yaşağanımız qadar, kanal da yaşaycaq. Er şey tek bizge bağlı endi. Şimdi kanalnıñ aktsiyaları satıla. Biznen birlikte bir çoq adamlar teessisçiler sırasına kireler. Men eminim, o inkişaf etecek», - dep qayd etti Memetov.
Telekanlnıñ baş müdiri Elzara İslâmova qayd etkeni kibi, ATR çeşit basamaqlar keçti. «9 yıl içinde ATR ağır bir yol keçti, atta az qaldı qapatılacaq edi. Amma, ATR dayandı. Soñra, Allahnıñ izni ile, yatırımcı peyda oldı, kanalnıñ yañı ,keyfiyetli basamaqqa irişmesi içün imkânlar yarattı. Bugün, biz – eñ eyi regional kanalı sayılamız, bunı reytinglerimiz tasdiqlay», - dey İslâmova.
Baş müdirniñ sözlerine köre, kanalnıñ öz mühlisleri bar. «Bizni sevip, baqalar. Biz er alda, kede rve quvançlı daqiqalrda destekni duyamız. Biz halqnen berabermiz, oña hızmet etemiz – bu yeñişimizniñ eñ müimi, ve bu sevgini coymamaq içün qolumızdan kelgenini yapacaqmız», - dey İslâmova.
Telekanalnıñ soñki yañılığı - bu aktsiyalarnıñ satıluvıdır, istegen er kes, ATR-ge muracaat etip, onıñ teessisçisi ola bile. Baş müdirniñ aytqanına köre, seyirciler bu ğayege faal seslendiler.
«Aktsiyalarnı satıp alalar, sağ olsunlar. Bu, şirketniñ inkişafı içün yañı bir usul. Halqqa ait olğandan soñ, onı resmiyleştirmek kerek. Biz buña yaqınlaştıq. Elbette, qıyınlıqlar bar, adliye tarafından elbette, amma biz bunı al etemiz. Bu usulnıñ kerekligini er kes añlay, ağır vaqıtta kanalnı desteklemek ve stabilligini pekitmek kerek», - dey İslâmova.
Sentâbr 13, cuma ertesi künü birinci qırımtatar telekanalı yañı aktsionerlerniñ toplaşuvı ötkerilecek.
