Link açıqlığı

Refat Çubarov Aqmescitteki «mecburiy» konferentsiya iştirakçilerini narazılıq bildirmege çağırdı


Qırımtatar Milliy Meclis reisi Refat Çubarov

Qırımtatar Milliy Meclis reisi Refat Çubarov «Qırımtatar halqınıñ zemaneviy alı» konferentsiyasına barmağa mecbur olğan adamlarnı Rusiye tarafından işğal etilgen Qırım akimiyetiniñ qırımtatarlarğa qarşı yapılğan areketlerge narazılıq köstermege çağırdı.

Bu aqqında Meclis reisiniñ Facebooktaki saifesinde derc etilgen muracaatta aytıla.

Refat Çubarov qayd etti ki, sentâbr 6-da Aqmescitteki Qırım akademik ukrain muzıkalı teatrinde keçirilgen konferentsiyağa kelmege mecbur olğan iştirakçiler «az sayılı ve bölüci olaraq belli olğan cemaat teşkilâtlarına» ait.

Refat Çubarovnıñ bildirgenine köre, Meclis vekiline konferentsiyada çıqışta bulunmağa imkân bermediler: «Qırımtatar Milliy Meclisiniñ reis muavini Ahtem Çiygoznıñ «konferentsiya» iştirakçileri ögünde çıqışta bulunmaq teklifine «konferentsiya» teşkilâtçıları, şu cümleden Remzi İlyasov ve Zaur Smirnov, kesen-kes yoq dediler».

Meclis reisi işbu «konferentsiyanı» qırımtatar halqını bölmek ve millet vekilleri arasında dava doğurmaq nevbetteki ıntıluv dep adladı.

XS
SM
MD
LG