Qırımnıñ öz başına ilân etilgen baş naziri Sergey Aksönov qırımtatar halqını Qırımda keçirilgen cemaat siyasiy, içtimaiy, medeniy ve iqtisadiy leyhalarda iştirak etmege çağırdı.
Bunı o cumaertesi künü, sentâbr 6-da, Aqmescitteki «Qırımdaki zemaneviy basamaqta qırımtatar halqınıñ al-vaziyeti aqqında» bütünqırım konferentsiyasında ayttı, – dep haber ete Qırımnıñ öz başına ilân etilgen ükümet «ruporı» «Krıminform» saytı.
«Qırım – bizim bir evimizdir, ve bizler umumiy problemlerniñ al etilmesini isteymiz ve qırımtatar halqınıñ vekillerini Qırımda keçirilgen bütün leyhalarda iştirak etmege davet etemiz», – dep qayd etti Aksönov.
Onıñ aytqanına köre, qırımtatar halqınıñ yarımadanıñ cemaat siyasiy yaşayına qoşulması Qırım ögünde qoyulğan problemlerni keyfiyetli surette al etmege imkân berecek.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
