Qırımnıñ öz başına ilân etilgen baş naziri Sergey Aksönov bildirdi ki, Qırımdaki vaziyette «qırımtatarlarnıñ ekseriyeti sentâbr 14-te saylavlarğa kelecek».
Bunı Aksönov sentâbr 5-te Yaltada bildirdi, – dep haber ete Qırım «ükümetiniñ» «ruporı» «Krıminform» saytı.
«Qırımtatarlarnıñ çoqusı Qırımnıñ Rusiye Federatsiyası terkibinde bulunmasınıñ müsbet tarafını añlay», – dedi o.
Aksönovnıñ qayd etkenine köre, «qırımtatarlarnıñ içtimaiy problemleri al etilsin dep, 450 million ruble ayırıldı».
Aksönov dedi ki, qırımtatarlar içün Mekke ziyareti teşkil etildi, «Qırım Ukraina terkibinde olğanda akimiyet bunı iç bir vaqıt yapmağan edi».
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
