Gürcistan Ukrainağa 580 biñ dollarlıq gumanitar yardımınıñ birinci qısımını yollaycaq. Bunı sentâbr 5-te memleketniñ emek, sağlıq saqlav ve içtimaiy qoruv naziri David Sergiyenko bildirdi, – dep haber ete İTAR-TASS.
Onıñ aytqanına köre, Ukraina ilâc alacaq – «şeker hastalığı olğan adamlar içün, antibiotikler, balalar içün aşı» ve diger ilâc.
David Sergiyenko bildirdi ki, «tibbiy yük toplanıldı, azırlanıldı ve yollanması mümkün».
«Tibbiy yük büyüktir, onı yolcu uçağınen yollamaq imkânsızdır, onıñ içün sentâbr 10-da Gürcistandan Ukrainağa naqliye uçağı yol alacaq», – dep qayd etti nazir.
Bundan evel, avgust 29-da, Sergiyenko Ukrainanı ziyaret etip, eki memleketniñ sağlıq saqlav nazirlikleri arasında işbirlik planı tizilgenini Tbiliside bildirdi. Oña köre, Gürcistan Ukrainada zıddiyet yerinde qalğan adamlarğa yardım etecek.
