Donbasstaki arbiy areketler keçirilgen yerde elâk olğan Rusiye arbiy adamlarınıñ sayısı eki biñ kişini teşkil etmesi mümkün.
RNBO malümat analitik merkeziniñ vekili Andriy Lısenkonıñ aytqanına köre, bu raqamlarnı ukrain istihbaratı köstere, dep haber ete Azatlıq Radiosı.
«Elâk olğanlarnıñ sayısını 4-ke arttırıp, yaralanğan adamlarnıñ sayısını tahmin ete bilemiz», – dedi Lısenko.
RNBO vekiliniñ malümatına köre, Donbassta alıp barılğan arbiy areketler devamında 846 ukrain arbiyi elâk oldı ve 3072-si yaralandı.
Rusiye Donbassta onıñ ordusı bar olğanını red ete.
Aynı vaqıtta Birleşken milletler teşkilâtındaki Rusiye vekili Vitaliy Çurkin bildirdi ki, Ukraina şarqındaki arbiy areketlerde rusiyeliler iştirak ete.
Rusiye akimiyetine qol tutqan bazı kütleviy haber vastaları Ukraina şarqında elâk olğan Rusiye arbiyleri aqqında haber etip, olar tatilde olğanını qayd eteler.
