2014 senesi sentâbr 8-de Ukrainanıñ vaqtınca işğal etilgen territoriyasına ukrainlilerniñ kiriş qaideleri deñiştirilecek. Bunı Ukraina Devlet sıñır hızmetiniñ matbuat hızmeti bildirdi.
Endiden soñ Ukrainanıñ vaqtınca işğal etilgen territoriyasına ketmek içün şahsiyetini ve Ukraina vatandaşlığını tasdıqlağan vesiqa olmaq kerek.
«16 yaşını toldurmağan balalar Ukraina vatandaşı pasportlarınen ketmek kerekler. Bundan evel doğuv şeadetnamesi ya da balanıñ yol vesiqası yeterli edi», – aytıla beyanatta.
Bu yañılıq «Ukrainanıñ vaqtınca işğal etilgen territoriyasında vatandaşlarınıñ aq-uquqları ve azatlığını ve uquq rejimini teminlev aqqında» Ukraina Qanunınen bağlıdır.
Qayd etmeli ki, şahsiyet ve Ukraina vatandaşlığını tasdıqlağan vesiqalar cedveli «Yekâne devlet demografik cedveli ve Ukraina vatandaşlığı, şahsiyet ya da hususiy statusnı tasdıqlağan vesiqalar aqqında» Ukraina Qanunınıñ 13-ünci maddesindeki birinci qısımnıñ birinci noqtasında belgilene.
Bundan ğayrı, 16 yaşını toldurmağan balalar qıtaiy Ukrainadan kelgen vesiqalar boyunca vaqtınca işğal etilgen territoriyadan çıqış iznini alacaqlar.
