Link açıqlığı

8 biñ insan Qırım ealisini cedvelge alacaq


İşğal etilgen Qırımda ealini cedvelge almaq içün 8 biñ insannı işke celp etecek olalar. Bunı Qırım statistika hızmetiniñ eali statistikası ve sağlıq saqlav bölüginiñ reberi Aleksandra Korniyenko matbuat konferentsiyasında bildirdi, – dep haber ete öz başına ilân etilgen Qırım ükümetiniñ «ruporı» «Krıminform» saytı.

Onıñ aytqanına köre, Qırımda oktâbr 14-25 künleri ealini cedvelge alacaqlar. Onıñ soñki neticelerini, anketalar teşkerilgen soñ, 2015 senesi mayıs ayında körmege planlaştıralar.

Bu işke meşğul olmağan, işsiz grajdanlar ve studentler celp etilecek. Bu maqsatnen Qırım statistika hızmeti Qırım aliy oquv yurtları ile añlaşmalar tizdi.

«Er bir çalışacaq insan 13,2 biñ ruble miqdarında aylıq alacaq. Olar 12 kün devamında künde 8 saat çalışacaqlar», – dep qayd etti Korniyenko.

Onıñ bildirgenine köre, cedvelge alacaq adamnıñ mahsus şalları, çanta, fotoresim ile mahsus şeadetnamesi olacaq.

«Bunıñnen beraber hadimlerimizniñ havfsızlığını kefil etmek içün işke uquq qoruyıcı organlarnıñ hadimlerini celp etecekmiz», – dep qoştı Korniyenko.

Bundan evel Rusiye Federatsiyasınıñ statistika hızmeti yarımadada cedvelge aluvnıñ azırlığını ve keçirilmesini eñ yahşı şekilde aydınlatacaq Qırımdaki regional kütleviy haber vastalarınıñ yarışını ilân etken edi.

XS
SM
MD
LG