Ukraina prezidenti Petro Poroşenkonıñ bildirgenine köre, NATO Sammitiniñ başında beş taraflı körüşüvniñ unikal formatı «NATO memleketleriniñ tışqı istilâğa rastkelgen Ukraina topraq bütünligine qol tutqanlarını» ifadeley. Bunı Poroşenko Büyük Britaniya baş naziri David Cameron, AQŞ prezidenti Barack Obama, Almaniya kantsleri Angela Merkel, İtaliya baş naziri Matteo Renzi ve Frenkistan prezidenti François Hollande ile körüşüvini izaatlar eken ayttı, – dep yaza devlet yolbaşçısınıñ matbuat hızmeti.
Devlet yolbaşçıları Ukraina Şarqındaki vaqilarda global, kontinental ve regional köntekstlerini muzakere ettiler ve üküm sürgen vaziyetni barışıq yollar vastasınen al etmek kerek olğanını qayd ettiler.
Ukraina prezidenti körüşüvni izaatlar eken, tarihte ilk sefer dünyanıñ beş eñ büyük memleketiniñ lideri formatında körüşüv olıp keçkenini qayd etti.
«Añlaymız ki, Ukraina, barışıq, istiqrar ve Şarqtaki vaziyetni al etüvge qol tutıp, olar Avropa ve dünya istiqrarına qol tutalar. Bugünde-bugün bu yalıñız ukrain zıddiyetiniñ meselesi degil, bu – bütün dünya meselesidir», – dep qayd etti devlet yolbaşçısı.
Petro Poroşenko bildirdi ki, bir qaç yöneliş boyunca fikirlerinen paylaştılar. Şu cümleden, Ukrainağa havfsızlıq saasında yardım muzakere etildi.
«Bugün NATO sammitiniñ rezolütsiyasında NATO tarafından Ukrainağa yardım kösterilecegi qayd etilecek», – dep añlattı prezident.
Onıñ bildirgenine köre, Ukrainanı mahsus programmağa celp etüv aqqında belli bir qararlar qabul etilecek.
Petro Poroşenkonıñ aytqanına köre, körüşüv iştirakçileri arbiy-tehnikiy işbirlik meselesine ayrı diqqat ayırdılar. Beyannamede NATO memleket-azalarınıñ Ukrainağa kösterilecek arbiy-tehnikiy yardımnıñ eki taraflı teminlevine qol tutqanı qayd etilecek.
«Biz bunı beklegen edik», – dep ayttı devlet yolbaşçısı. Onıñ qayd etkenine köre, sentâbr 4-te ileri adımlarnıñ koordinatsiyası, şu cümleden cezalar meselesinde areketler, muzakere etilecek.
