Link açıqlığı

Poroşenko bildirdi ki, sentâbr 5-te barışıq planını amelge keçirip başlaycaqlar


Ukraina prezidenti Petro Poroşenkonıñ aytqanına köre, cuma künü, sentâbr 5-te, Donbassta barışıq planını ömürge keçirip başlamaları mümkün. Bunı Azatlıq Radiosı yaza.

Devlet yolbaşçısınıñ vekili Svâtoslav Tsegolkonıñ Twitterdeki haberine köre, bunı prezident NATO sammiti başlağan Waleste aydınlattı.

Newport şeerinde Petro Poroşenko Amerika Qoşma Ştatlarınıñ prezidenti Barack Obama ile laf etti. Prezidentniñ Twitterinde aytıla ki, o, Amerika zenaatdaşı ile Rusiyeniñ Ukrainağa qarşı istilâsını muzakere etti.

Malüm olğanı kibi, cumaaqşamı künü, sentâbr 4-te, Walesteki Newport şeerinde NATO devlet-azaları yolbaşçılarınıñ sammiti açıldı.

Tedbirde Rusiyeniñ Qırım işğali ve Ukraina şarqındaki arbiy areketler ilerilemesinden soñ Avrasiyada üküm sürip başlağan vaziyet baqılacaq.

Sammitte NATOnıñ acele cevap quvetleriniñ meydanğa ketirilmesi, em de NATO ve onıñ ayrı azaları Ukrainağa kösterecek arbiy-tehnikiy ve gumanitar yardım muzakere etilecek.

XS
SM
MD
LG