Link açıqlığı

Qırım «samooboronası» adamlarnen beraber memuriy binanı blok etti


İşğal etilgen Aqmescitteki Samokişa soqağında «halq imayesi» «Krımpotrebsoyuz» binasını blok etti.

Qırım «ükümetiniñ» «ruporı» olğan «Krıminform» saytınıñ malümatına köre, al-azırda memuriy binada mındaki odalarnı icarege alğan bir sıra şirketlerniñ hadimleri qala, samooborona vekilleri olarğa çıqmağa bermeyler.

«Qara urba ve balaklavalarğa kiyingen samooborona vekilleri binağa kirsetmeyler – olarnıñ aytqanına köre, mında bir de bir komissiya temsilcileri kelmek kerek», – dep yaza ükümet neşiri.

Binada kira alğan şirket vekilleriniñ aytqanına köre, «halq imayesi» saat 15-te avtobusnen keldi. Şirket vekillerinden biri politsiyanı çağırdı, bundan soñ uquq qoruyıcılarnıñ eki gruppası keldi. Lâkin bir qaç daqqadan politsiya hadimleri bir şey yapmayıp, aylanıp kettiler.

Samokişa soqağındaki «Krımpotrebsoyuz» binasınıñ kiracıları arasında NTV telekompaniyası da bar.

Qırım «Devlet şurası» sentâbr 3-te saba «Krımpotrebsoyuz» mal-mülkiniñ devletleştirüfi aqqında qararnı qabul etti. Devletleştirilecek mal-mülkiniñ cedvelinde yarımadada yerleşken 28 bazar ve diger mal-mülk mevcut.

XS
SM
MD
LG