İşgal etilgen Qırım ve Aqyar sakinleri Ukrainanıñ diger bir de bir regionda oktâbrniñ 20-ne qadar devlet qayd etüv organına ariza berseler, nevbetten tış halq deputatlarınıñ saylavlarında rey berecekler.
Bunı jurnalistlerge Merkeziy saylav komissiyasınıñ reis muavini Andriy Magera bildirdi.
«Qırım boyunca, şimdilik umumiy qaideler qala – saylav adresini deñiştirmeyip, rey berüv adresini deñiştirmek imkânı. Böyle bir arizanı saylavlardan 5 kün ögüne, yani oktâbrniñ 20-ne qadar, Ukrainanıñ diger regionında cedvel organına bermeli», – dep añlattı o.
Mageranıñ qayd etkenine köre, qırımlı saylayıcı yalıñız çoq mandatlı saylav bölgesi boyunca rey bere bilecek.
«Yevromaydan-Krım» areketiniñ koordinatorları Merkeziy saylav komissiyasınıñ Qırım Muhtar Cumhuriyetinde yerleşken majoritar bölgelerde saylavlar keçirilmesini red etmek qararınen razı degiller.
Faaller qırımlılarğa internet vastasınen rey bermege imkân berecek sistemanı azırlamağa teklif eteler.
